அலமேலுவின் அட்டஹாசங்கள் - 4

கடந்த இரண்டு தடவையா  கொஞ்சம் சீரியஸ் பதிவாவே  போயிடுச்சு. எல்லார் மனசும் ரொம்ப பாரமாயிடுச்சுன்னு  தோணிட்டதாலயும்

இரண்டு தடவையா படிச்சு நொந்து போறப்பல இருந்ததாலயும் 

(இல்லன்னாலும் உன் பதிவை படிச்சு நாங்க நொந்துதான் போறோம்னு 

உங்க மனசு நினைக்கறது எனக்கு தெரிஞ்சுடுச்சு)  கொஞ்சம் மொக்கை

போட அலமேலுவை வரவழைச்சுட்டேன்.

இந்த பதிவின் மொத்த பலனும் அலமேலுவுக்குத்தான்.

(கம்பு,கட்டை,கல் எதாருந்தாலும் அலமேலு பாத்துப்பாங்க.நான்

ஒதுங்கிக்கறேன்)

அலமேலு ஆப்பரேஷன் செய்த டாக்டரிடம்:

அலமேலு: டாக்டர்.எனக்கு ஆப்பரேஷன் நல்லபடியா முடிஞ்சு 

தையல்லாம் போட்டாச்சா?

டாக்டர்: எல்லாம் நல்லா ஆயாச்சும்மா.

அலமேலு: அப்டின்னா எனக்கு ஒரு டம்ளர் தண்ணி குடுங்க.குடிச்சுப்

பாத்து தையல் வழியா ஒழுகாம  இருக்கா பாக்கணும்

டாக்டர்: ???????????????

                                           *************************************

அலமேலுவும் அவள் கணவர் அழகர்சாமியும்:

அழகர்: கேரட் வாங்கிட்டு வர  சொன்னேனே.வாங்கலையா?

அலமேலு: ஆமாம்.நீங்க நல்லா  இளசா பச்சை கேரட் கேட்டீங்க.

ஒரு கடையிலையும் பச்சை கலரில் கேரட் கிடைக்கவே இல்லைங்க.

அழகர்: ??????????????????

                                           *******************************

அலமேலுவும் அவள் தோழியும்:

தோழி:  நேத்தே உன் கிட்ட ம்யூசிக் அகாதமில இன்னிக்கி மாண்டலின்,

                கேளுன்னு சொன்னேனே கேட்டயா?

அலமேலு:  நீ சொன்னனு நானும் போயி  ஸ்ரீநிவாஸ் கிட்ட கேட்டேன்.அவர்

                       மாண்டலினைக் கொடுக்க முடியாதுன்னு சொல்லிட்டார்.

தோழி:  ????????????????????

                                               *******************************

அலமேலுவும் பத்திரிக்கை ஆசிரியரும்:

ஆசிரியர்: என்ன உங்க எழுத்துல உப்பு சப்பே இல்லை?

அலமேலு:  நீங்க அதை படிச்சு பாக்காம வாயில வச்சா பாத்தீங்க?

ஆசிரியர்:  ????????????????????????

                                                  ******************************

அலமேலுவும் அவள் மகனின் டீச்சரும்:

டீச்சர்: உங்க பையன் கணக்கே சரியா போட மாட்டேங்கறான்

அலமேலு: அதுக்கு காரணம் நீங்கதான்

டீச்சர்: என்னது? நானா?

அலமேலு:  ஆமாம்.ஒருநாளைக்கு அஞ்சும் ரெண்டும் ஏழுன்னு

                        சொல்லி கொடுக்கறீங்க.மறுநாள் நாலும் மூணும் ஏழுன்னு

                        சொல்றீங்க.அதுக்கடுத்த நாளே ஆறும் ஒன்னும் ஏழுன்னு

                        சொல்லி கொடுக்கறீங்க.உங்களுக்கே சரியா தெரியலைன்னா

                        எப்படி என் பையனுக்கு கணக்கு வரும்?

டீச்சர் :     ?????????????????????????

உயிர் காத்த உறவும் நட்பும்

சில நாட்களாகவே என் வாழ்க்கையில் நடந்த ஒரு சம்பவம் ஒன்றைப் பகிர்ந்து கொள்ள நான் நினைத்திருந்த சமயத்தில், சக பதிவர் சாகம்பரி அவர்கள் "இனிய இன்னல்கள் வேண்டும்"என்று ஒரு பதிவு வெளியிட்டிருந்தார்.அவரது அந்த பதிவு என் வாழ்க்கை சம்பவத்தை

பதிவாக்க மேலும் என்னைத் தூண்டியது.எனவேதான் இந்த சுய புராணம்.

ஒருமுறை எனது கணவர் வேலை நிமித்தமாக வெளியூர் செல்ல வேண்டி இருந்தது.அதே சமயத்தில் எனது மாமனாரும் குடும்ப விஷயமாக

வெளியூர் பயணிக்க வேண்டிய நிர்ப்பந்தமாகி விட்டது.எனவே வீட்டில்

நான், எனது மாமியார் மற்றும் பெண் மட்டும் இருந்தோம்.பல முறை இம்மாதிரி தனித்திருந்திருக்கிறோம் என்றாலும் அந்த முறை மிகவும்

சிக்கலான ஒரு சூழல் உருவாக்கி விட்டது.

கணவரும் மாமனாரும் கிளம்பி சென்ற அன்று எனக்கு லேசாக

காய்ச்சல் அடிக்க ஆரம்பித்தது.வெறும் காய்ச்சல்தானே, ரெஸ்ட்

எடுத்தால் சரியாகி விடும் என நினைத்து இருந்து விட்டேன்.

ஆனால் அன்று மாலை காய்ச்சல் அதிகமாகி விடவே வழக்கமாக

செல்லும் மருத்துவமனை வரை செல்ல இயலாமல் பக்கத்தில் ஒரு

டாக்டரிடம் சென்றேன்.அவர் கொடுத்த மருந்துகளையும்(அது ஓவர் டோசேஜ் என்று பின்னர்தான் தெரிந்தது) வாங்கி

வந்து வேறு ஆகாரம் எதுவும் சாப்பிட இயலாமல் வெறும் பிரட்

சாப்பிட்டு விட்டு மருந்தும் சாப்பிட்டு விட்டு படுத்துக் கொண்டேன்.

நடு இரவு இரண்டு மணி அளவில் பசிக்க ஆரம்பிக்கவே ஏதாவது சாப்பிடலாம் என எழுந்தேன்.படுக்கை அறையிலிருந்து சமையல்

அறை வரை வந்தது  மட்டுமே எனக்கு நினைவுள்ளது.அவ்வளவுதான்.

அதன் பின் எதுவும் நினைவில்லை.பின் எனக்காகவே எப்பொழுது

சுய நினைவு வந்ததோ அப்பொழுது கண் விழித்துப் பார்த்தால் நான் கிச்சனில் கீழே விழுந்து கிடந்தேன்.சரி நாம் மயக்கமாகி விட்டோம் போல.

எழுந்து ஏதாவது சாப்பிட்டு படுத்துக் கொண்டால் சரியாகி விடுமென

நினைத்து எழ முயற்சித்தால் என்னால் அசையவே இயலவில்லை.

ஒரு வழியாக கொஞ்சம் கொஞ்சமாக உருண்டு நகர்ந்து வந்து படுக்கை

அறையில் தூங்கிக் கொண்டிருந்த பெண்ணை எழுப்பி விஷயம் சொல்லி

ஹார்லிக்ஸ் கொடுக்கச் சொன்னேன்.அவள் என் மாமியாரை

சக்கர நாற்காலியில்(நடக்க இயலாதவர்கள்) அமர்த்தி அழைத்து வந்து

என்னருகில் துணைக்கு வைத்து விட்டு ஹார்லிக்ஸ் கரைத்து

எடுத்து வந்தாள். அதை குடிக்க எழுந்த போதுதான் கீழே விழுந்ததில் எனக்கு தலையில் பலமாக அடிபட்டு ரத்தம் வழிந்து கொண்டிருப்பது தெரிய வந்தது.(பின் தலை சிலிண்டரில்  அடி வாங்கி வெட்டு விழுந்து விட்டது) 

பின்னர் என் மகள் அவசர அவசரமாக ஈரத்துணி எடுத்து வந்து தலையில்

வைக்க என் மாமியார் தன்னால் எதுவும் செய்ய இயலவில்லையே

என்று பரிதவிக்க, உடனடியாக என்    அக்காவிற்கு    போன் செய்து  வருமாறு கூறினார்கள்.அக்காவும் அத்திம்பேரும் காரில் அவசர அவசரமாக

வந்தனர்.அதற்குள் ரத்தம் வெளியேறிக் கொண்டிருந்த காரணத்தால் மேல் வீட்டில் இருக்கும் பெண்மணியை வரவழைத்து என் பெண்ணை

மாமியாருக்கு துணையாக  வைத்து விட்டு ஆட்டோ பிடித்து 24  மணி நேர

ஹாஸ்பிடல் சென்றோம்.என் அக்கா அத்திம்பேரும்  அங்கு வந்து விட

தலையில் தையல் போடப்பட்டது.ரத்தம் வெளியேறிய காரணத்தால் ட்ரிப்ஸ் இறக்கி காய்ச்சலை குறைத்து வீட்டிற்கு அனுப்பினர்.

அதன் பின் அக்கா, நாத்தனார், என் மன்னி என்று ஒருவர் மாற்றி ஒருவர்

வீட்டையும் என்னையும் கவனித்து நிலைமை சீரானது.நடு இரவில்

கார் வைத்துக் கொண்டு வந்த அக்கா  அத்திம்பேர்  , ஆட்டோ பிடித்து அழைத்து சென்ற

மேல் வீட்டு பெண்மணி இருவருமே இரவென்றும் பாராமல் நாட்டு நடப்பை பற்றிய பயத்தை ஒதுக்கி வைத்து அன்று என் உயிர் காத்தனர்.

இவர்களை எல்லாம் வரவழைத்த மாமியார், வரும் வரை திருதிரு என்று விழிக்காமல்  நிலைமையை சீராக கையாண்ட எனது மகள் மற்றும்
அந்த இரவையும் அன்று உதவியவர்களையும்  நான் என்றும் மறக்க மாட்டேன்.

சாகம்பரி அவர்கள் கூறியது போல, பாரதிக்கு எப்படி எல்லா உறவுகளும்

கண்ணன்களோ அப்படி நமக்கும் எல்லா உறவுகளும் கண்ணன்களே.

"இன்னும் இனிய இன்னல்கள் வேண்டும் என் இனிய உறவுகளைக் கண்டு கொள்ள" என்ற சாகம்பரி அவர்களின் வாக்கியத்தை நான் பரிபூரணமாக 

உணருகிறேன். 

பல நாட்களாக பகிர எண்ணி இருந்த இந்த பதிவை சரியானபடி
வெளிக் கொணர்ந்தததற்கு சாகம்பரி அவர்களுக்கு நன்றி கூறிக் கொள்கிறேன்.நன்றி சாகம்பரி.

"காணும் உறவெல்லாம் கண்ணனே".

நல்லதோர் வீணை செய்தே...

                                            

இன்னும் நான்கு பேர் இருக்கிறார்கள்.வந்து ஒருமணி நேரமாகிறது.

தாமதமாகும் என்று அறிந்ததுதான்,ஆனாலும் என்ன செய்ய?இந்த

மனசுக்கு கொஞ்சமும் பொறுமை இல்லையே.பார்வையை சுழல விட்ட படி இருக்கையில் சற்று சாய்ந்து அமர்ந்தாள் மஞ்சரி.

பக்கத்து சீட்டில் ஒரு குழந்தை இவள் பார்த்ததும் வெட்கமாய் சிரித்து
முகம் திருப்பிக் கொண்டது.காரிடாரில் ஒரு வயதானவர் சக்கர நாற்காலியில் கையில் ட்ரிப்ஸ் ஊசியுடன் முகத்தில் வேதனையுடன்
அழைத்து செல்லப்பட்டார்.குறுக்கும் நெடுக்கும் நர்ஸ்கள் வெள்ளை
சீருடையில் அலைந்து கொண்டிருந்தனர்.

கால்களை நீட்டி கை விரல்களில் சொடக்கு எடுத்தாள்.கண்களை சிறிது
நேரம்  மூடி திறந்தாள்.லேசாக வலி கிளம்பினாற்போல் இருந்தது. இப்படித்தான் ஒரு மாதமாகஅடிவயிற்றில் ஒரு வலி.முதலில் சற்று அலட்சியப் படுத்தி பின் கை வைத்தியம் செய்து ஒன்றுக்கும் மசியாததால் டாக்டரைப் பார்த்து எல்லா வகை டெஸ்ட்டிலும் வகைக்கு ஒன்றாக செய்து அப்பெண்டிசைடிஸ், சிறுநீர்ப்பாதை கல்,குடலிறக்கம்,மாதாந்தரப்

பிரச்சனை எதுவுமில்லை என்றாகி இப்பொழுது கடைசியில்  ப்ளட் டெஸ்ட்

ரிப்போர்ட்டுடன் காத்திருக்கிறாள் டாக்டரை  சந்திக்க.

"நெக்ஸ்ட் நீங்கதான் போகலாம்" எனறாள் நர்ஸ்

"எக்ஸ்க்யூஸ் மீ டாக்டர்" என்ற குரலுடன் உள்ளே சென்றாள்

சோன் பப்டியை தலை முழுதும் கவிழ்த்துக் கொண்டாற்போல் பளபள

வெள்ளை முடியுடன், ரிம்லெஸ் கண்ணாடியின் வழியே நிமிர்ந்து

பார்த்தவர், "எஸ்.கம் இன்" என்றார்.

"உக்காருங்க.கூட யாரும் வந்துருக்காங்களா?"

கேள்வியின் வித்தியாசத்தை உணர்ந்தும் ஆராய முடியாமல்,

"இல்லை டாக்டர்! நான் மட்டும்தான் வந்துருக்கேன்" எனறாள்.

"ஒக்கே! உங்க ப்ளட் ரிப்போர்ட் கொடுங்க" என்று வாங்கி ஆராய்ந்தார்.

அதை வைத்து விட்டு சில   நிமிடங்கள்  அமைதியாய் இருக்க அந்த நிமிடம்

மஞ்சரியின் வயிற்றில் லேசாக ரங்கராட்டினம் சுழல ஆரம்பித்தது.

"என்ன டாக்டர்,எதுவுமே பேசாம இருக்கீங்க?ஏதாவது பிரச்சனையா?" எனறாள் எச்சில் கூட்டி விழுங்கி.

"ம்....ம் ....... அது வந்து எப்படி சொல்லறதுன்னு தெரியலை பட்

சொல்லித்தான் ஆகணும்.தனியா வேற வந்துருக்கீங்க.ஹஸ்பன்ட்

வரலையா?"

"இல்லை டாக்டர்.சும்மா ரிப்போர்ட் காமிக்கத்தான்னு நான் மட்டும் வந்தேன்.எதாருந்தாலும் பரவாயில்லை டாக்டர்! என் கிட்டே சொல்லுங்க ப்ளீஸ்"

"எப்படி பாத்தாலும் இதை முக்கியமா உங்க கிட்டதான்மா முதல்ல

சொல்லியாகனும்,அப்பதான் ட்ரீட்மென்ட்டுக்கு சௌகர்யமா இருக்கும்.பட்...

உங்க ஹஸ்பென்ட்டால வர முடியாதா?"

"இல்லை டாக்டர்.அவர் இப்ப ஊரில இல்லை.கம்பெனி விஷயமா

வெளிநாடு போயிருக்கார்.வர இன்னும் ரெண்டு மாசமாகும்"

"ஓ.....! வேற யாரும் ....?"

"டாக்டர்!ப்ளீஸ். எனக்கு என்னனு நான்தான் முதல்ல தெரிஞ்சுக்கணும்.தயவு செஞ்சு சொல்லுங்க.நாளைக்கு வேணா நான் யாரையாவது கூட்டிக்கிட்டு வரேன்,ப்ளீஸ் டெல் மீ"

"ஓக்கே! பட் நான் சொல்றது உங்களுக்கு அதிர்ச்சியாத்தான் இருக்கும்.
இருந்தாலும் நீங்க  வற்புறுத்தி கேக்கறதாலயும்,தைரியமாவும் சரியாவும்
புரிஞ்சுக்குவீங்கங்கற நம்பிக்கைலையும் சொல்றேன்.
 ஏற்கனவே உங்க ப்ளட் ரீடிங்  சரியா இல்லங்கறதாலதான்

மறுபடி எடுக்க சொன்னோம்.பட் அதுக்கு முன்னாடியே உங்களுக்கு

எடுத்த "போன் மேரோ பயாப்சி" ரிசல்ட் வந்து கன்பார்ம் ஆயிடுச்சு.அதாவது

உங்க பிளட்ல  ப்லேட்லட் கவுன்ட் அப்நார்மலா இருக்கு.அதாவது உங்களுக்கு வந்திருக்கறது "த்ரோம்போசைதிமியா".

"அ.. அப்.. அப்டின்னா...?"

"அதாவது உங்களுக்கு ப்ளட்ல ப்லேட்லட் கவுன்ட் அதிகமா இருக்கறதால,

அது தானே க்ளாட் ஆக வாய்ப்பிருக்கு.இப்போதைக்கு இதுக்கு மருந்து இருக்கு.ஆனா உங்களைப் பொறுத்தவரை இந்த மருந்து  எத்தனை

மாசம்,வருஷம் வேலை செய்யும்னு தெரியாது.ஓடற வரை  ஓடும்.அதுக்கப்பறம் இதோட முடிவு....... "ப்ளட் கேன்சர்"தான்.ட்ரீட்மென்ட்டுக்கு நீங்க கோ ஆப்பரேட் பண்ணனும்கறதாலயும் உங்க கணவர் வரவரையில் ட்ரீட்மென்ட்

ஆரம்பிக்காம இருக்க முடியாதுங்கறதாலயும் இதை உங்க கிட்ட சொல்றேன்.மனசை திடப் படுத்திக்கோங்க".

"இதுக்கு தீர்வு எதுவும் இல்லையா டாக்டர்?" குரல் கம்மி பிசிறியது.


"இதுவரை எதுவும் கண்டு பிடிக்கலைம்மா.ஆண்டவன் இருக்கான்.

நமக்கு மேல உள்ள சக்தியை நம்புவோம்.இப்ப மருந்து எழுதிருக்கேன்.

சாப்பிடுங்க.முடிஞ்சா நாளைக்கு யாரையாவது கூட்டிக்கிட்டு வாங்க"

"யாரும் தேவை இல்லை டாக்டர்.இதை என்னை விட பெட்டரா யார் புரிஞ்சுக்கணும்? அடுத்து எப்ப வரணும் டாக்டர்?" கண்களில்  வெளி வரத்துடித்த  நீரை அடக்கினாள்

"இனி  மாசத்துக்கு ஒருதடவை செக் அப் வரதுதான் சரிம்மா.நடுவுல  ஏதாவது பிரச்சனைனா கட்டாயம் பாக்கணும்"

"வரேன் டாக்டர்"

"அப்பறம் ஒரு விஷயம்.கூடுமானவரை அடி எதுவும் பட்டுக்காம பாத்துக்கங்க.ரத்தம் நிக்கறது கஷ்டம்"

"புரியுது டாக்டர்.நான் வரேன்"

"வார்ட் பாய் யாரையாச்சும் துணைக்கு அனுப்பட்டுமாம்மா?"

"இன்னிக்கே எனக்கொண்ணும் ஆகப் போறதில்லையே டாக்டர்.

என்னை பாத்துக்க கடவுள் இருக்கார்னு நான் நம்பறேன்.அப்படியே

ஏதாவது ஆகப் போறதா இருந்தாலும் இன்னும் இந்த உலகத்துல சில

நல்லதை செய்ய எனக்கு கொஞ்சம் டைம் கொடுப்பார்,அப்படி இல்லைன்னாலும் இதுதான் அவர் விருப்பம்னு எடுத்துக்கறேன் டாக்டர்"

உறுதியும் நம்பிக்கையுமாய்  எழுந்த மஞ்சரியை வருத்தமும் வியப்புமாய்   பார்த்தவர், "உங்க  கிட்ட இருக்கற இந்த  தன்னம்பிக்கை,இதுவே உங்களை  வாழ வைக்கும்.காட் ப்ளஸ் யூ மை சைல்ட்" என்றார்.

மெலிதான புன்னகையை சிந்தி விட்டு எழுந்து சென்றவளைப்

பார்த்துக் கொண்டிருந்தவரின் கவனத்தை   "நல்லதோர் வீணை செய்தே..."

என்று அவரது கைபேசி கலைத்தது.

                                                    **************************

பின் குறிப்பு :  த்ரோம்போசைதீமியா(thrombocythemia )  என்பது மைலோப்ரோலிஃபெரேடிவ் டிசார்டர் (myeloproliferative disorder ) என்பதன் ஒரு வகை.

இது ஒரு வகை ரத்த குறைபாடு.இதற்கு தீர்வு கிடையாது,இது பற்றிய ஆராய்ச்சிகள் கடந்த 25 ஆண்டுக்காலமாக நடைபெற்று வருகின்றது.எனவே மருந்துகளின் மூலம் இதனை கட்டுப்பாட்டிற்குள்
வைக்கும் அளவு இப்பொழுது நடைமுறையில் உள்ளது.மருந்து கேட்காமல் போய்விட்டால் கீமோதெரபிதான்(chemotherepy ) அடுத்த நிலை.மேலும் இந்த த்ரோம்போசைத்தீமியா முற்றும் நிலையில் ப்ளட் கான்சராகும்(blood cancer ) வாய்ப்பு அதிகம்.ஆனால் த்ரோம்போசைத்தீமியாவாக இருக்கும்
வரை இவர்கள் உடலளவில் திடமாகவே இருப்பார்.எந்த மாறுதலும் உடலில் தெரியாது.எல்லோரையும் போல சுறுசுறுப்புடனும் சக்தியுடனுமே
செயல் பட இவர்களால் முடியும்.உடலில் இதற்கென வலி போன்ற
உபாதைகளும் தோன்றாது.

நான்கு வகை ப்ளட் கான்சரில் ஒரு வகையான க்ரானிக் மைலாய்ட் லுகெமியாவிற்கு(chronic  myeloid leukemia ) மட்டும் மருந்து
கண்டு பிடிக்கப்பட்டு அடையாறு கேன்சர் இன்ஸ்டிட்யூட்டில் இலவச சிகிச்சை அளிக்கப் படுகிறது.மற்ற மூன்று பள்ட் கேன்சர் வகைகளுக்கு இன்னும் மருந்து கண்டு பிடிக்கப் படவில்லை.
த்ரோம்போசைத்தீமியாவால் பாதிக்கப் பட்டவர்களை மையமாக வைத்து எழுதப் பட்ட ஒரு சிறுகதை இது.மரணத்தை எதிர்க்க தன்னம்பிக்கையும் இறை நம்பிக்கையும் மருந்துகளை விட முக்கியமானது என்பதற்காக எழுதப்பட்ட சிறுகதை இது.

ஊடல்

 ஒருநாள் ஒரு யுகமானது

 ஒருவர் இருவர் ஆனதால்.

வார்த்தைகளற்ற வெற்றிடம்

வளர்ந்து வதைத்தது.

மௌனமே வலியின்

மொழி பெயர்ப்பானது.

அலுவலகமோ அசட்டையானது

அடுப்பங்கரையோ அனலடித்தது.

உதடுகள் சிரிக்க மறுத்தது

உணவு உப்பு இழந்தது.

குழந்தைத் தூதுகள்

குடையை விரித்தது.

எனினும் வலியும் சுகமே

ஏங்கிக் காத்திருக்கையில்.

உன் பார்வைக்கு நானும்  

என் சிரிப்பிற்கு நீயும்

எதிர்பார்த்திருக்கையில்,

கூடலின் சுவை கூட்டக் கூடிய 

ஊடலின் வலியும் சுகமே  

ஒருதலை ராகம்

டைட்டிலைப் பாத்ததுமே அவங்கவங்களுக்கும் கற்பனை ஓடுமே.

ஆஹா! ராஜி ஏதோ ஒன் சைட் லவ் பத்தி எழுதி இருக்காங்க போல

அப்டின்னு நினைச்சு வரவங்க எல்லாம் ஏமாற வேண்டியதுதான்.

இது ஒருதலை ராகம்னு ஒரு படம் வந்ததே அப்ப நடந்த ஒரு

விஷயம்.அடச்சே! அவ்வளவுதானான்னு சொல்லறீங்களா? ஹா! ஹா!ஹா!

"ஒருதலை ராகம்" படம் வந்த புதுசுல அந்த சினிமாக்கு போக ஆசைப்பட்டு அப்பாகிட்ட எப்பிடி பர்மிஷன் வாங்கறதுன்னு தெரியாம கடைசி

அண்ணாக்கள் ரெண்டு பேரும் யோசிச்சுக்கிட்டு இருந்தாங்க.

சட்டுன்னு யோசனை தோணி ஐயோ பாவமா இருக்கற என்னை(!!)

கூப்பிட்டு "நீ  கணக்குல நல்ல மார்க் வாங்கிருக்க,அதனால நீ

போய் அனுமதி கேளு.நீ கேட்டா அப்பா சரின்னுடுவார்"னு என்னை

உசுப்பேத்த நானும் பேக்கு மாதிரி (மாதிரி என்ன அப்படியேதான்னா

சொல்லறீங்க?) அப்பா கிட்ட கேக்க அவர் இருந்த அறைக்கு போனேன்.

அதுவரைக்கும் இருந்த தைரியம் எல்லாம் அவர் அறை வாசல் கிட்ட

போனதும் ஓட்டை விழுந்த தண்ணிப் பானை கணக்கா வடிஞ்சு போச்சு.

சட்டை நுனியைத் திருகிக்கிட்டே நானும் திரு திருன்னு முழிச்சிக்கிட்டு

வாசல்லையே தயங்கி தயங்கி நின்னேன்.

ஏதோ ஃபைல் பாத்துக்கிட்டுருந்தவர் வாசல்ல என்னைப் பாத்ததும் "என்ன வேணும்?"னு கேட்டுட்டு மறுபடி ஃபைல்  பாக்க  ஆரம்பிச்சுட்டார்.
மெதுவா உள்ள போயி நின்னேன். அவர் நிமிந்து பாத்து "என்ன வேணும்?"னு கேட்டார்.

"வந்து.. வந்து... அண்ணா எல்லாரும் "ஒருதலை ராகம்"ங்கற சினிமாக்கு

போக பர்மிஷன் வாங்கிண்டு வரச்சொல்லி அனுப்பிச்சா".

(அடிப்பாவி! கவுத்துட்டாளே! - இது அண்ணாக்களோட மைன்ட் வாய்ஸ்)

"என்ன படம் பேரு சொன்ன?"

"ஒருதலை ராகம்"

"ஓ.....! சரி,  நீ ஒண்ணு பண்ணு.முதல்ல ஒருதலை ராகம்னா என்னனு

தெரிஞ்சா சொல்லு.நான் பர்மிஷன் தரேன்"

".................................................."

"என்ன? அர்த்தம் சொல்றயா?"

"என்ன கேட்டுண்டிருக்கேள் அவளை" என்று காபியுடன் அங்கு வந்த

என் ஆபத்பாந்தவி, அனாதரட்சகி, பெற்ற தாயினும் உற்ற துணையேது

என்பது போல் வந்தாள்

ஓடிச்  சென்று அம்மாவின் புடவைத் தலைப்பை பிடித்துக் கொண்டு நின்றேன் நான்

"உன் புத்திர சிகாமணிகளுக்கெல்லாம்  ஒருதலை ராகம்  சினிமா  போகணுமாம்.அதுக்கு இந்த பெரிய மனுஷி தூது.அதான் ஒருதலை ராகம்னா 

என்ன அர்த்தம்னு தெரியுமான்னு கேட்டுண்டிருக்கேன்"

"சின்னக் குழந்தை கிட்ட போய் (அம்மா அம்மாதான்) என்ன கேக்கறேள்?

நீ போடி" என்று என்னை வெளியே அனுப்பி என்னை ரட்சித்தாள்  

அதன் பின் அப்பாவே தியேட்டருக்கு ஃபோன் செய்து டிக்கெட் புக் பண்ணி,

சென்று வர ஜீப்பும், துணைக்கு எங்கள் வீட்டில் இருந்த வாட்ச்மேனையும்

அனுப்ப ஜாலியாய் சினிமா பார்த்து விட்டு வந்தோம்.

வந்த பின் தூக்கக் கலக்கத்தில் சாப்பிட்டுக் கொண்டிருந்த என்னைப் பார்த்து, " என்ன? படம் பாத்தயே! இப்பவாவது ஒருதலை ராகம்னா என்ன

அர்த்தம்னு தெரிஞ்சதா?" என்று கேட்டார்.

"அதெல்லாம் தெரியலை.ஆனா அதுல இது குழந்தை பாடும் தாலாட்டுன்னு

ஒரு பாட்டு நல்லாருந்தது"  

"குழந்தை  பாடும் தாலாட்டா?குழந்தை எப்படி தாலாட்டு பாடும்? என்ற அவரது 

அடுத்த கேள்விக்கு நான் எனது வழக்கம் போல் திரு திரு முழியை

பதிலாக்கி விட்டு தட்டையும் கையும் அலம்ப எடுத்தேன் ஓட்டம்.

காலம்

                                              

எத்தனை விதம்! எத்தனை விதம்!

வரவேற்பறையில் ஒன்று,
வசீகரிக்கும் வண்ணமயமாக

கூடத்தில் ஒன்று,
கூவுகின்ற குயிலுடனே                                                                                                                               

சமையலறையில் ஒன்று,
சத்தம் தரும் விதமாக

படுக்கையறையில்ஒன்று

பாடல் ஒலி  இசையுடனே                                                                                                                        

வட்ட வடிவில் ஒன்று,
வீட்டு வடிவில் ஒன்று

சதுர வடிவில் ஒன்று,
சாய்ந்த வடிவில் ஒன்று                                                         
                                                                                          
வடிவங்கள் பலவிதம்,
வண்ணங்கள் பலவிதம்

கடிகாரங்கள் பலவிதம் - ஆனால்,
காலமதோ ஒன்றுதான்.

ஆயினும்,

கடிகாரங்கள் ஓடவில்லை
காலமதோ...................????????

கடிகாரப்பழுது சீராகலாம்
காலப்பழுதோ...........????????

"மைத்ரீம் பஜத"

இது எனது ஐம்பதாவது பதிவு. எனவே இந்த பதிவு எனது எண்ணங்கள் அடங்கிய பதிவாக இல்லாமல் உலக ஷேமத்திற்காக நமக்கு வரமாக

இறைவன் அருளிய மகானின் உயரிய நெறிகள் கொண்ட பதிவாக 

அமைக்க எண்ணி இதனை பகிர்கிறேன்.மகான்களைப் பற்றி எழுதவோ 

பேசவோ கூட  ஒரு தகுதி வேண்டும்.ஆனால் இந்த பகிர்வை

எனது பாக்கியமாக நான் எண்ணுகிறேன்.இப்பதிவை ஸ்ரீ காஞ்சி மகா பெரியவாளின் அனுக்ரஹத்துடன் துவங்குகிறேன்.

                                                                                                                                                                                                                                     

         

ஸ்ரீ காஞ்சி மகா பெரியவாளின் அற்புத தத்துவம் சகலத்திடமும் சமமான

அன்புதான்.அவரது சாஸ்வத சத்யமான அன்புதான் அவரை

உலக நாடுகளின் பேரவைக்கு "மைத்ரீம் பஜத" என்ற கீதத்தை அருளச் 

செய்தது.

சகல நாடுகளுக்கும் அவர் வழங்கிய இந்த கீதம் மக்களுக்கு மற்றுமோர் கீதோபதேசம்.

மறைந்த ஸ்ரீமதி எம் எஸ் சுப்புலக்ஷ்மி அம்மாள் அவர்களின் இசைப்பணிக்கும் ,இசையின் மூலம் இறைப்பணி மற்றும் உலகப்பணிக்கும் உலக நாடுகளின் முன் ஒரு நிகழ்ச்சி ஒரு விஜயதசமி நன்னாளில் 1966 , அக்டோபர் மாதம் 23 -ம் தேதி  ஏற்பாடாயிற்று.அவரது சார்பில் விடுக்கப்பட்ட வேண்டுகோளுக்கு

செவி மடுத்து ஸ்ரீ மகா பெரியவாள் உலக சபைக்கு ஒரு ஆசி கீதம்

இயற்றினார்.இன்று பள்ளிகளிலும் மற்றவர்களுக்கும் இது ஒரு

வழி நடத்தும் கீதமாயிற்று.

"மைத்ரீம் பஜத அகில ஹ்ருத் - ஜேத்ரீம்

 ஆத்மவதேவ பராநபி பஷ்யத  

 யுத்தம் த்யஜத, ஸ்பர்தாம் த்யஜத

 த்யஜத பரேஷ்வக்ரமம்-ஆக்ரமணம்

ஜநநீ ப்ருத்வி  காமதுகாஸ்தே,

ஜநகோ  தேவ சகல தயாளு:

தாம்யத, தத்த,  தயத்வம் ஜநதா:

ச்ரேயோ பூயாத் சகல ஜநாநாம்.

( அனைத்து இதயங்களையும் வெல்வதான அன்பை பயிலுங்கள்,

  அன்னியர்களையும் தன்னிகராகக் காணுங்கள்.

  போரினை விடுங்கள், போட்டியை விடுங்கள்.

  பிறனதை பறிக்கும் பிழையை விடுங்கள்.

  அருள்வாள் புவித்தாய், காமதேனுவாய்.

  அப்பன் இறைவனோ அகில தயாபரன்.

  அடக்கமும்,ஈகையும், தயையும் பயிலுங்கள்.

  அனைத்து மக்களுக்கும் உயர்நலம் விளைவதாக)

மித்திரன் என்றால் நண்பன்.நட்பு என்பது பலனற்ற பிரியமாக மட்டுமே

முடிந்து விடாமல் நட்புக்குரியவனை நல்வழிப்படுத்திக் காக்கும் சக்தியாகவும் இருப்பதே "மைத்ரீ" .அதாவது ஒரு சத்குரு செய்யும் பணியே

மித்திரன் செய்கிறான்.ஆனால், உச்ச ஸ்தானம் ஏறாமல் ஒட்டி உடன்

நின்று செய்கிறான்.

ஆனால் நமது இந்த சத்குருவோ தாமே, உச்ச ஸ்தானம் பாராட்டாது

உடனொட்டி உறவாடி மித்ரனாக வாழ்ந்து காட்டியவர்.

இங்கு ஆண்டவனுடன் நம்மைச் சேர்க்கும் உபாயமான யோகமாக

நட்பை பயில வேண்டும் என்பதால் "பஜத" என்ற பதம் சேர்க்கப்பட்டுள்ளது.

"மைத்ரீம் பஜத" என்பது ஒரு தோழமை யோக மந்திரம்.

மித்திரன் என்பது சூரியனையும் குறிக்கும் ஒரு சொல்.உயிர்கள்

அனைத்திற்கும்  ஸ்தூலத்தில் (உடம்பு) ஜீவ சாரம் அளித்து, சூக்ஷ்மத்தில்

அறிவுப் பிரகாசத்தையும் தூண்டி விடும் உற்ற நண்பன் அல்லவா?

பசுமரங்கள் நிழலளித்து உணவளித்து காற்றளித்து நம்மைக் காக்கும்

மித்ரனல்லவா?

ஜீவநதிகள் உயிர்களின்  தாகம் தீர்த்து உடலை சுத்தம் செய்யும்

மித்திரனல்லவா?பாலமுது பொழியும் பசுக்கூட்டம் நமது மித்திரனே

                    

இந்த மித்திரர்களான அனைத்தும் தன்னலமற்று பிறர் நலனுக்கென்றே இருப்பவை.

இந்த மித்திரர்களிடத்திலிருந்து  எல்லாம் உயரிய நலன்களைப் பெறும்

நாம் நமக்குள்ளும் மித்திரர்களாய் இருந்து அனைவரும் உயரிய நலன் பெற பிரார்த்திப்போம்.

மகான்களின் ஆசிகள் பெறுவோம்.

"எந்தரோ மகானுபாவுலு 

 அந்தரிகி வந்தனமுலு

உணவே வா... உயிரே வா...

மதிப்பிற்குரிய மனோ மேடம் அவர்கள் சாப்பாட்டிற்கான தொடர்
பதிவிற்கு என்னை அழைத்திருந்தார்.அதன் தொடர்ச்சியே இப்பதிவு.

"அன்னபூர்ணே சதாபூர்ணே

 சங்கர பிராண வல்லபே    

 ஞான வைராக்ய சித்யார்த்தம்         

 பிக்ஷாம் தேஹி ச பார்வதி"

(அன்னபூரணியே! எங்கும் எதிலும் எப்பொழுதும் நிறைந்திருப்பவளே!

சங்கரனின் அன்புக்குரிய சக்தி ரூபமே! பார்வதி தேவியே!ஞானமும் வைராக்யமும் நிலைக்கும்படியான   உணவு பிச்சையை  எனக்கு நீ இடுவாயாக!)

சாப்பாடு,  உலக உயிர்களின் அடிப்படை ஆதாரம்.அந்த ஆதாரம்

ஒவ்வொரு உயிரினங்களுக்கும் வேறுபடுகிறது.மனித உயிரினத்தில்

கூட உணவு என்பது அவர்களின் பழக்க வழக்கங்களுக்கேற்ப

மாறுபடுகின்றது.ஆனால் பொதுவாக அனைவருக்கும் நன்மை பயக்கக்

கூடிய சில உணவு முறைகள் என்பது உண்டு.

நன்மை பயப்பவை எல்லாம் நாவிற்கு ருசியானதாக இருக்க

வாய்ப்பு குறைவே.இருந்தாலும் உயிருடன் இருக்கும் வரையிலும்

உடல் நல குறைவின்றி வாழ சிலவற்றை நாம் கடைப்பிடிக்க வேண்டிய

கட்டாயத்தில் உள்ளோம்.அதில் சிலவற்றை இங்கே காண்போம்.

சிற்றுண்டியைப் பொறுத்தவரையில் வயிற்றுக்கு எளிதில்

ஜீரணமாகக் கூடிய இட்லி தொந்தரவில்லாதது.

கோதுமையில் நாம் நார்ச்சத்து பெற இயலும் என்பதால்

சப்பாத்தி போன்றவற்றை எண்ணை இடாமல் தயாரித்து உண்ணலாம்.

தொட்டுக் கொள்ள காய்கறிகள் நிறைந்த சப்ஜி சேர்த்துக் கொள்ளலாம்.

(இதுல ஏதாவது சந்தேகம் இருந்தா ஓவர் டூ கோவை 2 தில்லி)

ஓட்ஸ் நம் உடலில் உள்ள கொலஸ்ட்ராலைக் குறைக்க உதவுவதால்

அதனைக் கஞ்சியாகவோ உப்புமா செய்தோ சாப்பிடலாம்.அல்லது வேக வைத்த ஓட்சில் பழக் கலவைகள் போட்டு கொஞ்சம் பால் விட்டு சாப்பிடலாம்.(எவன் சாப்பிடறதுனுலாம் முணுமுணுக்கக் கூடாது.உடம்புக்கு

நல்லதாக்கும்)

சோயாவிற்கு  இதயத்தை சீராக இயக்க வைக்க கூடிய சக்தி

இருப்பதால் சோயா பால், சோயா பவுடர் போன்றவற்றை

சாப்பாட்டில் சேர்த்துக் கொள்ளலாம்.

ஒரு கிண்ணம் அளவான ஸ்ட்ராபெர்ரி பழத்துண்டுகளில்

ஒரு தம்ளர் ஆரஞ்சு சாற்றின் அளவு விட்டமின் சி கிடைக்கின்றது.

எனவே ஆரஞ்சு ஜூஸ் தயாரிக்க இயலாத சமயங்களில் ஸ்ட்ராபெர்ரியைஉட்கொள்ளலாம்.

கேரட்டில் உள்ள பீட்டா கரோடின் ஆண்டி ஆக்சிடன்ட் தன்மை

உடையது.புற்று நோயைத் தடுக்க உதவுகிறது.அதே சமயத்தில்

உடலில் உள்ள ஆரோக்கியமான செல்களை காப்பாற்றுகிறது.

கேரட்டில் இருக்கும் விட்டமின் ஏ கண்களின் ரெட்டினாவைப் பாதுகாக்கவும், அதன் கரோடினாய்ட்ஸ் குருட்டுத் தன்மையை தடுக்கவும்

ஏதுவாகின்றது.கேரட் ஒரு குறைந்த கலோரி உணவு.எனவே உடல்

பருமனை குறைக்க பச்சை கேரட்டையோ அல்லது எண்ணை

அதிகம் சேர்க்காமல் சமைத்த கேரட்டையோ எடுத்துக் கொள்ளலாம்.

வாணலியில் சிறிது ஆலிவ் ஆயில்  சேர்த்து அது சுட்டதும்

கேரட்,சீரகம் (உடலின் உள்ளுறுப்புகளை சீர் செய்வதால் இது சீரகம்), கொஞ்சம் மிளகு சேர்த்து உப்பு, மஞ்சள் பொடியும் போட்டு

வதங்கியதும் கொத்தமல்லி தழை சேர்த்து சாப்பிடலாம்.

கேரட்டை வேக வைத்துக் கொண்டு அதில் ஆப்பிள் ஜூஸை பரப்பி 

கொஞ்சம் உப்பு கொஞ்சம் சர்க்கரை சேர்த்தும் சாப்பிடலாம்.

பச்சைக் காய்கறிகளான பீன்ஸ் அவரை போன்றவை நார்ச்சத்து மிகுந்தவை.இவை நமது உடலிலிருந்து தேவையற்ற கழிவுகளை நீக்க உதவுபவை.

பாகற்காய் கசப்பு உள்ள காய்தான் என்றாலும் இது பல விதத்தில் நமக்கு நன்மை செய்ய வல்லது. முக்கியமாக இதில் இன்சுலின் இயல்பாகவே உள்ளதால் நீரிழிவு நோயாளிகளுக்கு மிக நல்லது.இரத்தத்திலும்,

சிறுநீரிலும் உள்ள சர்க்கரை அளவை இது கட்டுப்படுத்துகிறது.

பெண்களுக்கு ஒழுங்கற்ற மாதவிடாயை சீர்படுத்தவும்,தாய்ப்பால் நன்கு சுரக்கவும் வல்லது.நம் உடலில் உள்ள கிருமிகளை அழிக்கும் சக்தியுள்ளது.

(இனி யாராச்சும் கசப்புன்னு முகம் சுளிப்பீங்க?)

வாழைத்தண்டு,வாழைப்பூ முதலியவை வாரம் ஒருமுறையேனும் உணவில் இருப்பது அவசியம்.வாழைத்தண்டு சிறுநீரக கல் சேராமல் தடுக்கும்.

ஓக்கே!இப்ப டீ டைம். ஆனா நாம இப்ப குடிக்கப் போறது கிரீன் டீ.

இதிலிருக்கும் கேட்டசின்ஸ் எனப்படும் ஆண்டி ஆக்சிடன்ட்கள்

உடலில் புற்று நோய் செல் தோன்றிய பின்னும் அதை அழிக்க வல்லது.

(தலை முடி கூட நரைக்காதாக்கும்)

அடுத்தது நம்ம உணவுகளின் நடுநாயகமாக வீற்றிருக்கும் தக்காளியேதான். இதிலிலுள்ள லைசோபின்ஸ் இதயத்தை நன்கு

பராமரிக்கும் குணமுள்ளது.தக்காளியை சூப் வைத்தும் பச்சைத்

தக்காளியை ஜூஸ் அடித்தும் சாப்பிடலாம்.இல்லேனா ஹார்லிக்ஸ்

விளம்பரத்துல முன்னாடிலாம் வருமே, அதுபோல அப்படியே

சாப்பிடுவேங்கற  ரேஞ்சுக்கும் போகலாம்.(இது ஆக்கப் பொறுத்தும் ஆறப்

பொறுக்காதவங்களுக்கு)

அப்பறமா என்ன பாக்கலாம்? வால் நட்? இது மூளையின் ந்யூரான்

ட்ரான்ஸ்மிட்டர்களை (தமிழ்ல?) பராமரித்து மூளையின் செயல்பாட்டுத்

திறனை அதிகரிக்க வைக்கிறது.(ஓ! இப்பத்தான் புரியுது எனக்கு, நான் ஏன் இம்மாம் புத்திசாலியா இருக்கேன்னுட்டு.நான் இதை நிறைய சாப்பிடறேனே.அதான்)

முளை கட்டிய தானிய வகைகள் உடலுக்கு சக்தி அளிக்கக் கூடியது.

தினமும் ஒரு கிண்ணம் முளை கட்டிய ஒரு தானிய வகை உண்டால்

உடல் அதிக சக்தி பெறுகிறது.

     

நம்ம கதாநாயகன் (நாட்டில பாதி பேருக்கு இது இல்லாம சமைக்கவே தெரியறதில்லை,அதான் இது கதாநாயகன் ஆயிடுச்சு) வெங்காயத்தைப்

பத்தி பாக்கலாமே.வெங்காயம் மட்டுமில்லாம இதோட தம்பி பூண்டும்

சேர்ந்து நம் உடலுக்கு ஆபத்து விளைவிக்க கூடிய தேவையற்ற

கழிவுகளை உடலில் தாங்காமல் நீக்குகிறது.

ஆலிவ் பழங்கள் பெண்களின் கரு முட்டையை பலப்படுத்துகிறது.

கருவேப்பிலை  - (கரு+வெப்பு+இலை).வெப்பு என்றால் நோய்.

பெண்களின் கருப்பப்பை சார்ந்த நோய்களைத் தடுப்பதால் இது கருவேப்பிலையாகிறது(இதுக்கும் நரை தடுக்கும் சக்தி உண்டு.)

கடைசியாக என்ன ஐட்டம் தெரியுமா? ஹா...ஹா... நம்ம பழைய

சாதமேதாங்க.முதல் நாள் சாதத்துல நீரூற்றி வைத்து மறுநாள்

அதில் கொஞ்சம் மோர் விட்டு நல்லா பிசைஞ்சு சின்ன வெங்காயம்

சேர்த்து சாப்பிட்டா ஆஹா! என்ன ருசி என்ன ருசி!

முதல் நாளே சாதத்துல தண்ணி விட்டு வைக்கறதால இதுல நமக்கு

நன்மை செய்யற பாக்டிரியாஸ் ட்ரில்லியன்  (தமிழ்ல கர்ப்பம்) கணக்குல

உருவாகுது,இது நமது உணவுப் பாதையை ஆரோக்கியமா வைக்கிறது.

பழைய சாதத்துல பி 6 , பி 12 நிறைய இருக்கு.சின்ன வெங்காயத்தோட சாப்பிடறதால நோய் எதிர்ப்பு சக்தி அதிகரிக்கிறது.எந்த நோயும்

வராததோட இளமையா கூட வைக்குது.நாள் முழுக்க நமக்கு புத்துணர்ச்சியைக் கொடுக்கின்றது.(நானெல்லாம் பழைய சாதம் விரும்பி

சாப்பிடுபவள்) ரத்த அழுத்தம் கட்டுபாட்டுக்குள் இருக்கும்.உடல் எடை குறையும்.(தச்சு மம்மு, தச்சு மம்முதான்)

அதனால நாம இனி உணவே மருந்தாய் கொண்டு ஆரோக்கியமா

வாழ எல்லாம் வல்ல அந்த அன்னபூரணி அருளட்டும்.

அன்னபூரணியோட அருள் மட்டும் இருந்தா போதாது,இன்னும் ஒருத்தரும் அருளணும்.அது நம்ம உழவர்கள்தான்.

"உழவுக்கும் தொழிலுக்கும் வந்தனை செய்வோம்"

இந்த தொடர் பதிவுக்கு சக பதிவர் அமைதிச்சாரல் அவர்களையும்,

புதுகைத்தென்றல் அவர்களையும் அழைக்கிறேன்.வேண்டுகோளுக்கிணங்கி

தொடருமாறு கேட்டுக் கொள்கிறேன்.