அக்கறை

                     



அடுத்த வீட்டின் அறிமுகமன்று

அடிக்கடி குசலம் அவசியமன்று

அதிகப்படி வார்த்தைகள் எதெற்கென்று,

அருகே அமர்வோர் காதில்

அடைப்பான் பொருத்தி 

அழகிய கைபேசியோடு பயணத்தில்,

அவரவர் வேலைகள்

அவரவர் நேரங்கள் என்று

அடைத்துப் போன உணர்வுகளாய்,

அவசர வாழ்வில் இங்கே

அர்த்தமற்ற வார்த்தையாய்

அகன்று போனதென்ன

அக்கறை என்ற மனிதம்!!

அங்கே ஒரு காகம் இறக்க

அக்கறையாய் பல காகங்கள் கரைகிறது.

அதனிடம் கற்போமா?

கரையும் அவற்றின் முன்

கறையாய் நாம் அக்'கறை' மறந்து....